Beth yw Cyngor Gwasanaethau Gwirfoddol Sir Ddinbych?
Elusen leol annibynnol yw Cyngor Gwasanaethau Gwirfoddol Sir Ddinbych sy’n cefnogi datblygiad y Trydydd Sector yn y sir – elusennau, mentrau cymdeithasol, mudiadau gwirfoddol, grwpiau cymunedol, cydweithredfeydd a mudiadau llawr gwlad eraill sy’n gweithredu’n wirfoddol er budd pobl Sir Ddinbych. Mae ein gwasanaethau ni’n cynnwys:
- Darparu gwybodaeth, cyngor a chymorth ynghylch cyllid, llywodraethu a materion allweddol eraill
- Hyrwyddo a chefnogi gwirfoddolwyr a rheoli gwirfoddoli, rhannu arferion da a darparu hyfforddiant a phrosiectau megis Drysau Agored a Bydis Digidol
- Cynorthwyo mudiadau trydydd sector i ymgysylltu â’r sector cyhoeddus a rhanddeiliaid eraill er mwyn dylanwadu ar bolisi, cyllid a gwasanaethau a sicrhau cyfleu a chynrychioli anghenion cymunedau
- Yn benodol, gweithio mewn partneriaeth ar themâu llesiant, yn cynnwys cymorth i’r rhai sy’n byw â dementia
- Adnabod materion lleol a chynrychioli anghenion y gymuned gerbron y gwneuthurwyr polisi
- Gweithio ar y cyd ag asiantaethau eraill i ddatblygu prosiectau newydd fel menter gymdeithasol Neuadd y Farchnad yn Rhuthun
